********************************
( 1 )
قبل كم سنة كدا كان نويت اخطب وزي اي مغترب محتار اخطب منو واعرس منو .... فكرت كويس قلت ما دام الواحد ما راجع قريب لي السودان يشوف واحدة من بنات المغتربين الموجودين هنا .. وبدأت البحث......
انتظاري لم يطول فقد وصلت سريعا حيث وقعت عيني علي زول بناتو كبار بزورونا طواااالي حيث كنا نسكن عزابة بمستويات مختلفة فينا كبار وفينا صغار وفينا الموظفين والشغالين اعمال حرة وهلم جرا ,, خلاص قلت اشوف واحدة من بنات عمك دا والسلام وهو صديق احد اعمامنا الموجودين في البيت وهو من منطقتنا وشوفتا تعاملو وكرمو معانا كيف وترحيبو الحار بينا ودعوتو لينا باستمرار في كل المناسابات وكل خميس عمك بجينا البيت يتونس معانا ويشرب الشاي ويضرب معانا اكل العزابة عادي طبائع الزول دا عجبتني شديد وبعدين هو وسيم برغم انو كبير قلتا لي نفسي يا اخوي ما بتلقي زول احسن من دا ,, المهم استفسرتا جاي جاي لقيت عندو بت يادوب اتخرجت من الجامعة وهي شهادة عربية وحتكون فاهمة البلد -- سماحتها دي هي الباقية لي هل هي سمحة ولا شينة ؟؟؟ والله دا الباقي لي اعرفو ,,, بس كيف ؟؟ المهم انا قعدتا شهر اسال شوية شوية واجرجر عمنا الساكن معانا في الكلام برغم انو حسا بيا لكن هو زاتو ذي ما شافهم - قدر ما حاولتا اشوفها بقي لي صعب بس ربنا فرجها بزوجة خالي بعد ما جابها معاهو وطبعا هي قريبتي وبت حلتي يعني ما غريبة علي وخالي زاتو كان ساكن معانا بس هي جديدة في الغربة والحكاية محتاجة ليها صبر مني لحدي ما تتعرف عليهم وتتعود علي البلد ,, ما مشكلة نحن ورانا حاجة ؟؟
مرت الايام لحدي ما شوفتا عمك باسرته داخلين علي بيت خالي وطبعا كلهن اسود في اسود وعينك ما تشوف شئ كلوكلو -- اها الفرصة جات لحدي عندي وما بضيعها ,, تاني يوم طوالي مشيت ليك لي مرة خالي وقلت ليها : ناس فلان جوكم امس شايف ..
- اي والله ناس ظريفين .
- وجكسيهم كيف ؟؟
- ها بوهية مغتربين ساي
- هههه كيف يعني ؟؟؟
- هوووووووي شوف ليك واحدة من السودان وخلاص .
طبعا ما وصلتا معاها لي اي حاجة رغم انها شكرتهم بدون ما تقصد وادتني فكرة ما بطالة عنهم بس لسه محتار .. وقالو صاحب الحاجة ارعن عشان كدا اتحمست زيادة وانا بدردق في عمنا المعانا في البيت وابو البت في الونسة والعرس والجماعة حسوا بحاجة كدا عرفوا انو انا عندي نية زواج هنا في السعودية - والله ابو البنية طوالي قلب الموجة علي واهتمامو زاد بي شوية وكل ما يجي يسال الجماعة عني وهاك يا اتصالات وشاي مغرب وعمك اي برنامج عندو يتصل علي عشان اكون معاهم ,, غايتو خفتا قلت يمكن الزول دا الظاهر بناتو ديل بايرات ولا شينات شديد وعاوز يفكهم فيني ولا ما عارف شنو والله اول مرة اخاف زي كدا وانا زول مغامر ما بخاف من شئ مقتنع بيهو ... بس عمك دا حيرني من حركاتو معاي يا ربي انا فيني شنو عجبو ؟؟ وكمان ام البنية اتعرفت علي وقعدت كذا مرة ونستني هي وعمك وبصراحة الام قمة في الجمال دا الحيرني فيهم زيادة الاب وسيم والام جميلة زي دا معقولة يلدو ليهم شيتا لالالالالا ---الموضوع كان كدا فيهو شئ تاني غير السماحة وحسيت ليك اني زولا مهم خالص وما عارف نفسي وما مديها حقها لكن ما بطغي في الفاضي ---
الام والابو لمن شافوني ما عملت اي خطوة لقدام برغم كل العملو معاي دا ,,, قالوا احسن نشوف لينا طريقة نلاقي الجماعة ديل بدون ما يحسوا .........
اها يوم ابوها اتصل علي وبعد التحية قال لي : انا عاوز منك خدمة بسيطة ؟؟
فقلت : خير ياعمي مافي مشكلة قول .
قال : انا اليوم تعبان شوية والاولاد وامهم دايرين يمشوا يتسوقوا ممكن تجي توديهم؟؟
فقلت : جدا ولا يهمك حاضرين ... وكبكبة شديدة
.... طوالي بعد صلاة العشاء جيت لي الجماعة وديتهم السوق وانا سايق غلبتني ما قادر اركز عشان ما تنكشف الرجفة سائق بي خمسين بس وعلي طرف الشارع وحتي امهم قالت لي : انت سواقتك رايقة خلاص ,, وهي ما عارف حاجة ساي يعني انا لوم ماسمعتا صفارة السرعة ما بتكيف كلو كلو وكمان بعد مرات تخييط في الطريق ......... المهم نزلنا وهاك يا نظرات ورشاقة جبتها من وين ما عارف اليوم داك - والبت فاهمة الحكاية واتاري هي زاتها عاوزة تشوفني وتعرفني وهي كمان ملوها كلام وجاهزة هي شايفة كل شئ وانا ماشايف غير برقع مغطي وشها بس الحمد الله كا لابسه ليها نظارة قعر كباية - غايتو صوتها نااااااااااااااعم وكلامها براااااااااااحة ومشيتها غزالة بس وهي متوسطة في الطول والحجم ومخصرة ومفصلة والله حبة كرش مافي ولا العباية ماعارف - ولونها خمري جميل -بس قلتا دي زولتي والمواصفات دي كفاية والباقي ما مهم لان الباقي حيكون تمام التمام ومن امها عرفت اسمها وامها ماقصرت معانا في الونسة بعد ما اشترو حاجاتهم جلسنا قدام حديقة مركز التسويق نرتاح شوية من كترت اللف - بس بي صراحة طلعوا ظريفين ما خلوني ادفع ريال واحد من جيبي قدر ما اقول ادفع امها تحلف ذي الراجل - دحين ناس زي ديل الواحد بيفرط فيهم - المهم الام عملت فيها عندها مكالمة وزحت مننا شوية كدا - طوالي انا ما كضبتا وبدات اتونس معاها شوية شوية واتبادلنا ارقام الجوالات وبدات الحكاية تستوي والبسمات ظهرت و..و... وزحت برقعها وكتها انكشف قمر تقول لي القمر شنو وانا اقعد اعاين بس - دي كيف طلعت من السودان من غير ما تتزوج - ولا الناس القرو معاها عماية ولا انخلعوا بسماحتها دي وخافو منها - مرة اشبهها بمني زكي لا اقول هيفاء وهبي -- المهم زولة تسحر عديل كدي من جمالها والعجيب بمستها ووجاناتها -- قلتا يا زول انت كان كدي انت وقعت في كنز وما توري زول يخطفها منك زي ما بقولو قرض علي كدا ... شوية كدا وامها نادتنا عشان نمشي وانا محل السيارة واقفة نسيتو وامها تضحك فيني وتقول لي : انت ولد نساي شديد ... وهي ما عار فة حالتي من جوة كيف وكرعيني اشوفين خفيفات ارفع كراع وما عارف اوديها وين وراسي لافي لفة شينة خلاص دا كلو من الاغتراب الواحد لو شاف ليهو واحدة سمحة ساي بيتبهدل ويقطع في الكلام وعيونو ما يقدر يرفعها في وشها .. .
وصلتهم البيت وانا دخلتا البيت كاضم لا نضمي ولا حتي سلام عليكم سارح في خلاء الله البعيد ودخلت وطوالي علي السرير ونوم مافي والحمد الله اليوم التاني جمعة يعني الله لطف من دوام البلد دي اللي يكرهك الريالات ,,,
ااااااااااااه انا من الغربة ذكرتوني السودان ........
________________________________________
مر اسبوع بالتمام والكمال وانا الشوق كاتلني عشان اشوفة تاني وعمك من اليوم داك تاني ما شفتو - ومرتو بتكون اديتو الشمار طازج...... طبعا لا في درب مدرسة ولا عمود ولا ضل حيطة اقعد انتظرها فيهو وما بقدر امشي بيتم من دون شغلة - يا زول قلت اتوكل علي الله وادق ليها تلفون واكلمها واسمع صوتها الحماني النوم اسبوع كامل - وافتش التلفون طبعا كاتبو بي اسم واحد هندي عشان لو نائم وواحد هبش التلفون ما يعرفو -- ودقيت عليها وتلفونها يرن ...... ومافي رد خلاص انا انتهيت ,, قلت الزولة دي نستني والظاهر عليها ما ركبتا ليها في راسها وقعدتا احلل في حركاتي وكلامي معاها يا ربي هضربتا ليها بكلام كدا ولا كدا يا ربي البت دي ما عجبتها والكلام يدور في راسي ويودي ويجيب وانا قاعد جوة الاوضة والوقت عصرية واحد من الشباب حس بي ما طبيعي لي اسبوع كدا جاني داخل وقال : يا احمد مالك الايام دي نعل ما عيان ؟؟ وكان عمنا صاحب ابو البنية قاعد معانا قال ليهو : اسكت ساي زولنا دا ممحن محنة جد ويضحك ويعاين لي ... طبعا عمك كبير بس زول نكتة -- يرد ليهو : كيفن الكلام دا مالو عربيتو انسرقت ولا يمكن فصلو من الشغل ؟؟ وبصراحة ما قدرت اسكت وارد عليهو طوالي : المحنة الا تكون مصية !!! امكن عاوز اعرس . ويضحك : والله العرس محنة جد ,, الله يتم ليك ومالك شايل هم كدي ؟؟ موش الشنطة دي بنلمها ليك تاني في حاجة -- وارد عليهو : ياخ انا بقول امكن عاوز اعرس -- وانسحب طوالي واغمز لعمنا ما توريه حاجة واطلع برة -- قلبي ياكلني تاني واقوم اتصل بس برضو مافي رد وقربتا ابكي من الشرة وعدم التعبير ... خلاص الزولة دي مسحتني باستيكة ,, هسع عليك الله في داعي للتعب دا كلو شهور وانا داير اشوفها ولمن اشوفها تطنش الطنيشة دي ,, يا زول لازم تاني اتصل عليها واوريها هي منو ولا اقول ليك رسل ليها رسالة العن اليوم الشفتها فيهو ... لالالالالا الرسالة دي دليل بيتحسب عليك . ياخي هي حرة ما عاوزاك هو بالغصب ... بقيت لافي زي المجنون ما عارف امشي وين ولا اسوي شنو ونفس مافي لي اي شئ حتي النوم زاتو ابي لي اسوي شنو والعرق نازل مني وجسمي سخن ونبضي زاد من الزعل واحباط شديد والوقت داك كان واحد ناضمني ساي بطرشق فيهو ....
مرت ساعتين وانا في الحال دا في شد وجذب بس فجاة تلفوني ضرب واقوم اشوف دا منو المتصل كان القاها ليك زولتي وهزيت راسي زي الهندي وما صدقت - وقلبي برد شوية وشلتا نفس وخليتها لمن كملت النغمة وقمت اتصلتا عليها ....
- الو ,, سلام عليكم ,, كيفك ؟؟
- تمام ,, وانت ؟؟
- كويس الحمد الله
- معليش كنت نائمة وختيت الجوال في صامت
شلتا نفس طوييييييل وقلت ليها : انشاء الله نوم العوافي وانشاء الله ما اكون
ازعجتك بس .
- ابدا والله مافي ازعاج
والونسة جرت ووصلت لحدي : هوايتك شنو ,, اكلتك وما بعرفوا شنو وماشين في الغريق والكلام كلو مجاملات وكلمات كان قالو لي عيدها مرة تانية ما بقدر اعيدها جبتها من وين ما عارف ,, في اللحظات الزي دي الواحد بيكون خيالو خصب والخشم تب ما بيقيف من التكشم والبسيم -- ودعتها بعد ما شلتا منها الايميل عشان نشوف بعض ونتقابل بي راحتنا بس وين مع الشواطين العندنا الفي البيت ,, المهم مافي حل غير الكافية الجنبنا . وكلام ريدة بالماسنجر عمري ما حسيتو الا معاها وبقيت لمن اشوف صورتها ساي برتاح وهي كمان بتقول لي نفس الشئ ,, طبعا الاب والام شكلهم مراقبين الوضع وجايبين خبر وعاملين فيها ما شايفين ولا سامعين لانو عاوزيننا نتعرف اكتر .
استمر الوضع دا فترة ويوم رسلت لي رسالة قالت لي : انا ماشة السودان اجازة شهر وجاية مع امي واخواتي ,,, طبعا ما عندها اخوان الا ولد صغير كدا عمره تمنية سنين ,, كيفن الكلام دا نحن غرقنا خلاص دايرة تمشي وتسيبيني كدا؟؟ قلتا شهر ما كتير وودعتها وطلبتا منها لمن تمشي السودان ترسل لي رسالة من موبايلها هناك عشان اعرف رقمها واقدر ادق ليها وماقصرت طوالي ادتني رقمها وبقيت اتصل عليها بليل ونوم مافي والمصري بتاع البقالة الجنبنا بقي صاحبي من كترت كروت الشحن البشتريها منو .
يوم دقيت عليها قلتا ليها انا ما قادر اصبر وجاي السودان عديل عشان اخطبك انا بكلم ابوك هنا وبشوف رايو شنو وبكلم ناس بيتنا يبقوا جاهزين .. البت ادربكت بس في النهاية اقتنعت وقالت لي خلاص بس نشوف بعض قبل ما تجيب اهلك - طبعا انا لاعندي اجازة ولا اي شئ طوالي مشيت لي ناس الشغل وقدمتا طلب اجازة طارئة خمستاشر يوم وبعد تلتلة وتحانيس ادوني ليها وعلي حسابي وطوالي للسودان
واااااااااااااااااااااااااااااه انا من السودان ..............
________________________________________
________________________________________
طبعا مشيت ركبتا طيران العربية -- الله يقطعوا لطعة وشرة في مطار الشارقة خمسة ساعات وصلتنا زي النيسانات الساعة تلاتة صباحا بجوعة كافرة دا كلو عشان الرخصة , اخوكم شفقان ولفقان طوالي من صحيت من النوم ادق علي ندي ......
- صباح العسل يا عسل .
- احمد , حمد الله علي السلامة , بي لهفة كدا
- والله الشوق كاتلني عدييييييييل كدا يوم كامل ما اسمع صوتك
- بطل الحركات المابتاكل عيش دي وخلي جاكاتك دي ههههههه
- هسي انا كان بتاع جاكات بدق عليك قبل ما اتسوك - دا ما مرض
- تتبسم وتضاير ( انا حسيت كدا ) وبراحة تقول : انا زاتي مشتاقة شديد
- ما قلتي لي عاوز اشوفك
- مافي مشكلة تعال لينا في البيت
- شنووووووو البيت ؟؟ انتو دايرين تدقوني هناك ولا شنو ؟؟
- هههههه ما تخاف امي وابوي عارفين وكل ناس بيتنا فاهمين الحاصل
- برضو ما بتجي يقولو علينا شنو ..
- ما بقولو اي حاجة وانا ما بسوي حاجة من وراهم وامي زاتها قالت لي خليهو يقابلك في البيت وقدامنا وكمان خالتي واخواتي الهنا ومرة عمي عاوزين يتعرفوا عليك ويشوفوك ويسلموا عليك .
- طوالي فهمتا الحاصل شنو وقلتا ليها : طيب اجيكم متين ؟؟
- بكرة انشاء الله , مرة عمي بتجي من الثورة تقيل معانا واختي ( ناهد ) ما عندها جامعة و ( نها ) بتجي بدري .
- بس ما تقولي لي قيل معانا ؟؟
- تقيل شنو هههههه يا طماع تجي الضهر تتغدا وتمشي طوالي .
وقفلتا التلفون ...
اليوم التاني ظبطة اموري تمام ومن الصباح اتحكحك واتمسح تقول حايجيبوني في قناة هارموني ,,, طبعا نزلتا مع اخوي وكان ابوي جا من البلد ليهو يومين معاه ,, اشوفو برة في الراكوبة بيفطر ويعاين فيني ساااااااي وكت شاف حركتي كترت والطلعة والمرقة فيهو زي بوليس الحركة وقال لي :
- يا ولدي انت طالع ولا شنو ؟؟
- اي يا ابوي ماشي لي جماعة اصحابي مواعدم
- خلاص ما تتاخر بنتظرك بالغدا
- يا ابوي انا ماشي بعيد واحتمال اتاخر .
- خلاص يا ولدي الله معاك
حفظتا الوصف حفظ جد وانا كنت في المدرسة الا اندق مرتين تلاتة عشان احفظ , طينة بس في الحفظ لكن دا ما الحنان كلو بتنسي - وطلعتا اوقف لي شئ يوصلني بيتم واشوف بتاع البقالة يعاين لي باللمعة ديك والتي شيرت وبنطلون الجينز والجزمة البمسح فيها كل تلاتة خطوات من الغبار والريحة الماخمج موش ابو خمسة ريال وعشرة دي اول مرة اشتري لي ريحة غالية كدا الله يقطع سنين الحب والغرام هسع الواحد داير يعرس ولا يعرض نفسو في صالة ..
وصلتا البيت وادق الجرس ويدي تقيلة خلاص والعرق مع الكريم الفي الراس وعرق الخوف غسل لي وشي ولحظات وانا جوة البيت قعدوني في كرسي وبعد شوية بدا طابور السلام والام تشيل وتعرفني بي الاهل دي خالة ندي ساكنة جنبنا بهنا ودي عمتها وديل اخواتها ناهد ونها والله نها تشوفا تقول نسرين سوركتي والعجب فساتين البيت تحت التياب وخصلات الشعر الزي الحرير تتطاير قدام وشها وترفع فيها كل دقيقة وانا مبلم تقول صبة فيني مطرة وجات الدرة ( ندي ) تقدل وقلبي يقدل معاها - والله العباية كانت داسة جنس شئ وصوتي يقطع وابلع في ريقي وانطط في عيوني وهي تبتسم لي من بعيد وجاية علي ماشة زي السحابة تسبح في الموكيت وتمد يدها : متين جيت واسئلة عادية عشان تقطع الصنة دي وشوية نفسي يهدا والكلام يجيني واغمز لندي يعني اتكلم في الموضوع وهي تغمز لي مافي مشكلة وتقوم تستاذن عشان تجيب العصير وطوالي اعاين لي امها واقول :
- يا خالتي والله انا معجب باسرتكم ويشرفني نكون اهل .
- مافي مشكلة يا ولدي - ندي كلمتني بكل حاجة ونحن ما بنلقي زول احسن منك وربنا يتم ليكم علي خير وابو ندي بشكر فيك وبقول عنك زول كويس ومجتهد وود ناس ونحن ما عاوزين اكتر من كدا .
الونسة جرت معاهم كلهم وشوية شوية ينسحبوا ويخلونا انا وندي برانا - كل واحد يعاين لي التاني ويبتسم والباقي كلام دقاااااااااااااااق وما حسينا بالوكت الا الغداء قدامنا -- المهم ضربتا الغداء ووعدتهم اني بجيب اهلي واتفقنا يوم الجمعة الجاية وودعتهم وقالوا لي خلاص خليهم يجو المساء ونعملها خطوبة عديل وندي دايرة تعزم صاحباتها وعمها بقابلكم انشاء الله .
من دربي داك ابيت ارجع البيت وقلت فرحة زي دي ما بدفسة في اربعة حيطان والله كان امشي اشوف لي ضل شجرة بارد ولا اقعد لي في نجيلة كدا واسرح مع الطيور الهناك لحدي ما الواطة تمغرب علي الاقل الواحد يعيش مع نفسو شوية - المهم اختا قعدتي ديك والجكس جنبي في العامل فيها بذاكر وفي القاعدين اتينين اتنين وفي الطاشين ساي تلاقيهم جنبك وفي الزي كدا قاعدين سرحانين - وتب نفس ليهم مافي ما شبعااااااان حنان لحدي عيني ...
ومن دربي داك رجعتا البيت بعد ما كملتا قعدتي وصلتا بعد المغرب والجماعة متلمين ليك في البرندة اخوي وشفعوا ومرتوا وابوي بشوفوا ليهم في مسلسل . خلاص قلتا دي فرصتي افتح ليهم الموضوع بس شوية شوية عشان اسلاكم ما تضرب ...
ابوي سالني : اها نقوم البلد متين ؟؟
- والله يا ابوي انا عندي موضوع هنا عاوز اتموا وبعدين نمشي البلد براحتنا .
- أمك دي جننتنا كل مرة اها الزول جاي يسلم علي متين
- انشاء الله اسبوع كدا موضوعي بيخلص
- انت قلتا اجازتك كلها اسبوعين
- اعمل شنو موضوعي دا مهم شديد ولازم اشوف نهايتو
- اها الموضوع الماسكك في الخرتوم دا شنو
- موضوع عرس كدا
- بسم الله الرحمن الرحيم - هو قليك العرس تلوب كدا - لا اخطبو لي لا شوفو لي مرا لا دا
- انا المرا لقيتها وجاهزة .
- ودي من وين ؟؟؟
- والله يا ابوي البت دي من الخرتوم هنا واهلها من البلد بس ليهم تلاتين سنة ما فاتو البلد عدوها كلها غربة بس بيعرفوا ناس البلد .
- وديل ناس منو ديل ؟؟
وهاك يا شرح وطرح وكلام واخوي شغال يلاكز جاي وجاي ويصعب لي في الشغلة اتاريهو هو ومرتو ناوين ليهم علي نية علي ,, مرت اخوي دايرة لي واحدة من بنات اختها واخوي بهناك قال اخير نلم الزول دا علينا جاي علي اهل مرتي وزي ما قال جحا لمن سالوا : اهلك منو ؟؟ قال ليهم اهلي اهل مرتي ,, عشان كدا يشيل ويردم فيني ويقول لي :
- هوووووووووووي انت طولتا من البلد دي وما عارف الحاصل فيها شنو البلد دي منتهية والبنات حايمات ساااااااي .
- كيف الكلام دا يا اخوي ؟؟
- اسالنا نحن القاعدين فيها
- ياخوي السمح والشين والكعب والكويس في كل بلد في
- والله انت مخير شيل شيلتك ونحن نصحناك
يدخل ابوي ويغير الموضوع
- الناس ديل عرفتهم كيف ؟؟
وريتو بالحكاية كلها بدون التفاصيل التانية - طوالي حسم الموضوع وقال :
- والله ناس زي ديل انا بعرف اهلم وياهم معانا ومافيهم كلام - انا ما عندي مانع تب وانت عارفني ما قاعد اجبركم علي شئ ومديكم حريتكم كاملة - وضحك شوية كدا وقال : بس الا تخلي لعتمك البلد وانت عارفة صعبة وشديدة كيف ,, طبعا فهمتا كلامو قاصد بيهو شنو , عمتي عاوزاني لبنتها الباقية ليها بعد ما عرسو بناتها السمحات جت الا هي الباقية ليها ودايرة تعرسا لي بي اي طريقة عشان انا اكتر زول بقعد في بيتهم من اخواني ويومي كلو كنت بقضيهو معاهم .
المهم وريتهم البرنامج بتاعي والموضوع جاب زعل شوية في شان ما وريتهم الا بعد ما نجضت موضوعي براي بس رضوا بالامر وبقينا في الترتيبات وابوي يهز في راسو كل مرة ويقول في زول بجهز ليهو خطوبة في خمسة ايام - غايتو كان اخوك مسك ليك شغلتك دي بتقضي تب وهو مفتح وبجيهك كويس ويعاين لي ويقول : غايتو انا يا ولدي غير عمتي الفها في راسي دا وامشي معاك ما عندي ليك اي شئ - اقنع اخوك دا يرتب ليك الشبكة وكان علي امك انا من بكرة بكلم اخوك هناك يجي معاها .
- خلاص وكان علي موضوع الشبكة انا جايبة معاي .
اعين لي اخوي واقول ليهو : انت المشكلة شنو لو جبتا لينا فنان واشتريت معاي قولت خير والذي منو يعني خلاص حبكت معاك ياخي شوف بتكلف كم معاك وانا ما عندي مانع .. اخوي طوالي رخا وقال لي مافي مشكلة انا برتب كل حاجة بس فك ريالاتك العندك وخليها جاهزة ,, طبعا الحكاية بتكون فيها سمسرة شوية وما بتهبش جيبو -- والله انا عارف ما بطلع منها ساي يعني خطوبة وخراب جيب بس كلو هين عشانة بالجد عذبتني شديد .
و
________________________________________
________________________________________
من اليوم دا بقيت اغني ليك : يا يوم بكرة ما تسرع - عشان الشوق غلبني ,, وعشان اعلن مملكتنا الجديدة بتبدا من يوم الجمعة الجاية وعمتي شغالة لي شغل تقيل وهي جات مع امي وتصور وتحمض وكمان ما تقول السفر ملح وكمان فيها علاج ملح من وجع البطن والكرعين ومن ما شافتني مسكتني من جضومي وتشلق فيني :
- هسي يالمفعوص كان قلتا لي داير اعرس ما كان عرستا ليك وسقتا مرتك معاك طوالي .
- يا عمتي الموضوع دا جا براهو وبعدين اسوقا معاي وين انت قايلاني السفير السعودي احسن شئ يا عمتي تباركيها بس .
- يبركوا فيك خنق جاري للبدرة دي .
غايتو كلمة البدرة حرقتني بس اسوي شنو فهمها كدا غير اكب الزوغة منها واخليها مع امي يناضموا ساااااي وامي تقول ليها ( دايرا تبرر ليها وتنسيها ) : بري انا امو ما شاورني ,, من هناك متفقين . شباب الزمن دا عاد بنقدر عليهو !!!
- اها اتحزمي سااي وارجي الجايك والله موش نسوان الخرتوم ديل بورينك ليهو شديدات ولضيضات , هسع بتي الرضية مالا ما كان زيتنا في بيتنا ولا نحن لينا الله بس .
- الولد بقي راجل وانت لي يوم الليلة تشلقي فيهو .
- هوووي هو ود بتين وكان انتي امو الولديتهو انا امو الربتو
وتقول ليها : هسي دا كلو هين كدي نشوفوا جاب لي شنو .
وانا يا زول لابد تحت حيطة كدا والموبايل في اضاني واليد التانية التقول داير ااذن وامي تعاين فيني ساي وتقول لي الجماعة :
- الولد دا مالو جنا كدي طويبتو ( من طوبة ) دي ما بتفارق اضانو
- ياهو شباب الزمن دا
- والله يقعد يباريها كدي ويتفصل ليها الا تسوقوا من اضانو زي النعجة .
يوم الجمعة الهايس اتملت ومعاها بوكس والدلوكة تقول يا قدرتي غايتو الخطوبة براها بقت سيرة والبرنامج لازم امشي الكوفير اجيب البنية والجماعة التانين بمشوا عللي البيت دغري وبعدين علي النادي والنادي دا من عمها فنجرة سااااااي ونظام بوبار وكمان عربية ايجار والطيب ود عمتي سايق لي وعايش الجو صاح مع ترباس وانا راكب معاهو بقدام عشان ما شين للكوفير ودي فرحان بيها فرحة
- الليلة بحتو ليك حت جد اخلي ليك علالاتا فوق
- بس اوعك تقابض مقابضتك ديك وابقي رايق
- قال رايق والله كان الجكس بتاعون دا دوم بوصلك وبرجع اشوف لي نومة تنفعني
- دوم انت ,,هههه بس اوعك تفتح لي في خشمك وتسهي فيهن بعدين
ونمشي شوية والستك يضرب بينا تااااااااااح واسبير مافي ,, هسع نسوي شنو ؟؟؟ بي حيرة كدا
- اها يا الطيب اتصرف .
- اتصرف كيف ؟؟ انفخوا ليك بي خشمي !!!!
- خلاص عفرت العربية سريع وفكو ونشوف بنشر قريب من هنا
- هع هع يا زول انت ما نصيح دايرني بالشكة دي افك ليك اللستك ؟؟هع هع
- اها البفكو منو طيب ؟؟
- يا زول هووووووي انت ضمنتا خلينا نحن نشوف سوقنا وين
- انا عارفك ما زول حارة
- يا زول هووووووووووووي ما تكتر لي كلامك والله هسع افوت اخليك
طبعا الطيب دا زول غشيم بس طيب وحبوب ولمن تقفل معاهو لا بشوف قدام ولا بشوف ورا بشوت طوالي انشاء الله تطلع اوت عشان كدا لازم اهدي ليو شوية ...
- خلاص وقف لينا رقشة ولا تاكسي ولا اي مصيبة وكان علي اللستك انا بفكو .
- مافي مشكلة يا حبة .
ويوقف عمك بتاع التاكسي ماري بالشارع وشكلو من الصباح ما لاقي ليهو فردة يبرد بيها حشاه .
الطيب قال ليهو : سلام عليكم يا حاج
- اهلا وسهلا
- ياحاج والله اللستك دا ضرب لينا هنا ودايرين نودهو اي بنشر قريب
عمك يعاين في العربية ببالوناتها وشرائطها الحمرا والخضاء والوردية
- دي عربية عريس ولا شنو ؟؟
- اي يا حاج
- مافي مشكلة بلحق ليك عريسك دا الحفلة بس صلحوها معانا
- يا زول مافي مشكلة ما بنقصر معاك تب
- يلا ارفع اللستك وارح معاي وبشيل منكم سبعين الف
- معليش ياحاج ممكن تفك لينا اللستك اصلو عفريتة ما عندنا
- انتو بس بتاعين سواقة غير الطارة دي ما بتعرفوا الحبة لاقين عربات التقسيط دي وراكبنها
نسوي شنو سكتنا ساااي يقوم يزرقن معانا يخرب لينا الشغلانة مرة واحدة ووكت مافي للنقة ,,, الطيب وعمك بتاع التاكسي مافي نص ساعة الا اللستك ركبوا في العربية والجماعة بي هناك فلقو راسي كل مرة يتصلوا وين انتو حتي ندي ذاته لمن شافت نحن اتاخرنا قلقت واشيل واصبر فيهم : نعل ما حادث - واحد تاني : انا عارف الطيب بكجك وتالت : نرسل ليكم زول ....... هو المعاي انستر عشان ييني زول تاني .
الحمد الله ربنا وصلنا سالمين لي عند النادي والجماعة رابنها ربه ومن شافوا العربية انبهلو فينا ناسنا وناسم وفي ناس شمارات ساي من العروس عاوزين يشوفو العريس ياربي سمح ولا خلاقة وتلاقة وشين واهلي عاوزين يشوفو العروس عشان كدا كان الهجوم كاسح واعمامك من بعيد : هو يا جنيات ادوهو الدرب خليوم ينزلوا - ناس بهناك شغالين مخرجين لبتاع الكميرا وانا في اللحظة ديك بقيت زي رئيس الجمهورية راسي كبر - عالم واستقبالات وتصوير وفنان من اول ما دخلنا وقف غنيتو وادانا واحدة كدا بتاعت سيرة وننزل يجننا النسوان الكبار بالبخور والطيب بهناك يا زول اتنفخ نفخة جد ودي الدايرة وعمل طوالي وزير العريس - الشغلانة فيها لمات تولع وتطفي وكور لافة وموكيت مفروش والغنية معانا لحدي ما وصلنا للكوشة والطيب دا من وقف العربية برة ويديها ليك رقيص وكشف صاح وكان علي الفنان غايتو فنانا بفك الحيرة وكان علي الغنيتين الغاناهم قبل ما ينزل الفاصل الاول ما فهمتا منها شئ واحدة بتقول ( حاجة ) شنو كدا ما عارف بالهوسا والتانية : قال سنتر الخرطوم المهم الفنان نزل فاصل يرتاح فيهو شوية وفي اللحظة دي الجماعة شغلوا لينا شريط عربي لنجوي كرم والشباب اتلموا جنبنا ووقفوا فينا والبنات اترصن قدامنا وقالوا يلا اشبكا ,, اعاين في زولتي وفي عيونا اسرح في دنيا بعيدة خلاااااااااص والبسها الدبلة والحاجات التانية وتلبسني الدبلة واتمنيت في الوكت داك اصلو ما تزح يدها من يدي ونكون كدا ماسكين فوق بعض وما تفرقنا حاجة واشوف الوشوش قدامنا فرحانة لينا وكل الدنيا وتجي نها وناهد وامها وامي وبنات عمها وصاحباتها واهلي واشوف عمتي جاية علي من هناك كاريها ولدا الطيب وتبشر فيني وتقول لي في اضاني : عاد مع القمرة دي بتعرس بتي كيف ؟؟
اضحك ليها واقول : ما مشكلة يا عمتي بدبل بيها
هوي يا جنا الصيدا دي بدبلوا فيها شوف ليك شغلة اقضاها وتبارك لي وتمشي لندي وتعصر عليها وتقول ليها : يا بتي انا عمة احمد دا وولدي عديل ختيو في عيوناتك - ندي تعاين لي وتقول ليها : انشاء الله يا خالتي .
زولي الطيب من بارك لي اشوف هناك قاعد مع نسابتي يقرقر شكلو كا بقولهم في نكات وكمان جاب امي وامو وقعدم جنبهم ومن بدا الفاصل خماهم في نص الساحة وجراني انا وندي وهاك يا رقيص وبعد شوية جون صحبات ندي والطيب بجنبي : شوف البرتق دا جامعات ساااااااي والله الليلة التقانة ما فضل فيها زول ,, ياشر لي واحدة بجنبنا : البنفسجي دا كيف يا حبة .
اتلفت اشوفها نهي اخت ندي : يا زول دي اخت ندي
- ها زول انا ما بقيت عديلك تب
- عديلي !! انا اتفك من اختك تقع لي انت ؟؟
- يا زول مالي ناقص كراع ولا ناقص يد
- لا لا ما ناقص بس البت ما بيدوك ليها هسع عاين ليها كيس خلقة زي دي بجدعوها ليك سااااااي ؟؟!!!
شوية يجي ود عمها والنصيحة زولا مليان بالحيل رزانة وادب وذوق يسلم ويرقص شوية ويسحب نها ويقعدو ليهم في كراسي والطيب فاتح خشمو : والله القدح عندك .
- اها تاني شن قولك ,, البت ودايرا ود عمها
- يا زول انا الليلة اصلي ما بطلع ساي
- ياخ انا ما قلتا ليك خلي مقابضك دي
شوية نسمع ليك الفنان يغني ليو في اغنية : ( اللبن ابو لي بي ) والنقز اشتغل كل واحدة تنقز وزولي الطيب يكورك في نص الحفلة : ووووووب ووووب ,, شاف الغزلان دي كيف بتنطط وشالتو الهاشمية وقام كدي شالني ويبشر في الناس وحلف ماينزلني الا يلف بي الحفلة كلها ,, عدينها رقيص وفرح وبهجة وطرب والناس مبسوطة وخطوبة خمسة نجوم وتمت الحمد الله بخير .
في اليوم التاني ابوي قال لي : يا ولدي دايرن نعزم الجماعة نسابتك ديل قبل ما تسافر ويرجعوا
- مافي مشكلة يا ابوي انا بكلمهم .
خلاص الامور بقت سالكة بينم وبينا زي الاهل وبقينا نمشي ليهم ويجونا واسبوعين تمام ,, طبعا اخرتا سفري اسبوع بحالو عشان ارجع معاهم سوا وفي احلي من الحب في الطيارة والزولة بقت ملكي خلاص وكمان ماشين لي سجن ما عارفين نتقابل كيف ؟؟
وامي جات قطعت لي تفكري وقالت لي : اها يا ولدي ختوبة وشوفناها بتعرس بتين ؟؟؟ دايرين نفرح بوليداتك والدنيا ما معروفة .
- انشاء الله قريب يا امي ... نقول يا رب .
________________________________________
رجعت لشغلي زي اول ورجعت ريما لحالتها القديمة وكل شئ كويس .......
في يوم ندي مسكلت لي وقمت دقيت عليها :
- الو ندي كيفك
- اهلا وسهلا احمد وطوالي تقول لي :
- عاين يا احمد انا جاتني فرصة شغل
- خير انشاء الله شغلت شنو الفي السعودية كمان !!!!!!!!!!!
- لا الشغل مافي السعودية
- وين ؟؟!!
- في دبي
- دبي ؟؟؟؟؟؟؟؟
- اي اصلا انا من كذا شهر كدا مقدمة لشركة طيران عشان اشتغل فيها والحمد الله اتصلوا علي وقالوا لي نحن اعتمادنك معانا وحايشغلوني في مكتب دبي
- وهسع راي اهلك شنو ؟؟
- انا بهمني رايك انت قبل اهلي .
- انا ما عارف اقول ليك شنو , اها هسع لو مشيتي دبي بتسكني كيف وانت بت ؟؟
- انت لسه مع الحاجات دي عادي الشركة عندها سكن وكل شئ مرتب .
- انا خايف عليك من الغربة والبشتنة .
- الشغل ما فيو مشكلة وكان علي الغربة نحن من قمنا متغربين .
- لكن يا ندي انت المرة دي براك وما معاك اهلك .
- ما انت حاتكون معاي
- اكون معاك كيف ؟؟
- عقد العمل فيهو السكن عائلي وكل شئ علي الشركة
- اها وبعدين اقعد ليك في البيت ساي ولا كيف !!!!!!!
- لا طبعا , ما حاتشوف ليك شغل وبعدين انا وانت ما واحد
- نحن واحد ما قلت شئ بس الحكاية دي دايرا ليها تفكير
- دي فرصة عمرنا وما بتتكرر
- انتي هسع محتاجة للشغل ولا ساي ؟؟
- كيف ما محتاجة للشغل وانت عارف ابوي خلاص كبر والحمل بقي كتير عليهو
- كدي يا زولة خليني افكر وبرد عليك
- خلاص ما تتاخر علي انا في انتظارك
- يلا سلام
- سلام
تلفون ندي دا لخبط لي راسي وغير كل حساباتي وخلاني محتار حيرة شديدة خلاص وما قدرت اصل فيو لشئ وقت راسي صدع من التفكير قلت يا زول خليها علي الله والبسوي الله بتبقي واعمل طناش من الموضوع .
تاني يوم ندي تمسكل وتتصل لمن فترت وانا ما قدرت ارد عليها لانو ما عارف ارد اقول شنو وبعدين ما كنت رايق عشان نتناقش في الموضوع والنفسيات في الواطة وشوية اسمع ليك رنة الرسائل في الجوال كان القا رسالة من ست قلبي بتقول : ( محال انساك واسيب الريد وانسي هواك لانك في قلبي وقلبي انت شلتو معاك ... شنو الجفا دا ) - الرسالة دي عملت فيني عمائل وولعت في قلبي النار ودقيقة مافي اتصل عليها :
- الو ندي كيف عاملة
- كويسة ..شنو عامل فيها تقيل كدا
- والله يا حبيبتي كنت مشغول شديد وراسي ماقادر احكو
- كان ترد تقول لي مشغول
- معليش حقك علي , رسالتك تجنن انا كان عارف بتعملي كدا كان طنشت منك من زمان
- هوووي يا مستهبل , تاني تطنش كان اضبحك
تسكت شوية :
- شنو يعني ما راجية ردك
- والله حيرتيني معاك وما عاوز اكون عقبة في طريقك
- يعني موافق خلاص
- بصراحة كان قلت ليك خلي الشغل دا بتخليهو ؟؟
- والله عشانك ممكن
- خليك مني انا , اها عشان نفسك كيف ؟
- غايتو الشغل دا عاجبني وبعدين انا قريت عشان شنو موش عشان اشتغل
- هىىىى وانت قايلة الشركة دي شغلتك عشان شهادتك ؟؟
- نانا عشان شنو
- هسع وينا خبرتك الا كان خلقتك دي ودا المخوفني شديد وقاطع قلبي
- هاهاهاها هع ههههههههه
- هسع البضحكك في كلامي دا شنو
- بتغير علي للدرجة دي
- كيف ما اغير عليك والله بخاف عليك من الهوا الطاير
- اطمن انا ما بكون لزول غيرك وانت كل حياتي
- خلاص عديلة وربنا يحفظك , يلا مع السلامة
- مع السلامة
اقفل الخط بهنا كان تجيني منها رسالة : ( ورود الدنيا اخطفها وبشوق قلبي اغلفها ومع النسيم لاحلي حبيب ارسلها , الله يخليك لي )
في المسا جانا ابو ندي وسلم علي الجماعة وطبعا الجماعة يوسوسو ساي ويراقبوا فيني ويشاغلوا دي ما فرصتم كان قالوا لي اعمل اي حاجة بعملا سترة حال وانا وشي عاوز يقع من الخجل النسيب ما عين شمس وبعد السلام براحة سحبني من يدي وقال لي : يا ولدي البت ورتك بالشغل وورتني بموفقتك وانت كان ما راضي وبتجامل فيها ساي انا هسع بعقد ليك عليها وانت هي مخيرين بس اهملها كدي براها ما بسويها - انا قدرت الموقف وفهمت سبب كلامو يعني يا احمد الزولة دي لو ما عقدت عليها طريقة سفر ليها مافي وهو ما معترض علي الشغل بس دايرا تكون تحت راجل يحميها .
ودعت ابو النسب بعد ما اتعشا معانا بالقوة وبالضغط وحلاف طلاق من الجماعة في البيت ودا حالهم يهاظروا ويشاغلوا بس وكت الجد تلقاهم رجال .
بعد ما مشي وانا قاعد برة في الصالة بالشقة ناداني صاحب نسيبي وقال لي :
- اقعد انا دايرك
- خير انشاء الله نعل مافي شئ
- خير .. طبعا انت زي ولدي وبتكلم معاك كابن
- مافي مشكلة الموضوع شنو
- بخصوص البنية خطيبتك
ويسكت شوية ويكمل : ابو البنية كلمني قبيل في الشغل وحكي لي الموضوع كلو وحتة الشغل دي ما راكبا ليهو في راسو هو ومرتو الا اذا بقت معاك اها يا اخوي كان مستعد تعرسا هسع وتمشي معاها لدبي الموضوع بقي محلول ولا يمنعوها الشغل وقال لي : ياهو المرا في النهاية للراجل وهما شفقانين عليها من شحتفة الغربة وانت شايف براك نحن الرجال قولنا الروب عديييييييل كدي , اها شن قولك ؟
نفس تحليلي بالضبط والحسبتو لقيتو زي ماهو مفطس مفطس والكتلة جاتني لحدي عندي .
- بس انت شايف الحال براك نحن ما تمنيا شهر من الخطوبة وتكاليفا
- يا زول ابوها ما داير منك شئ بس تعقد عليها واقرب اجازة ليك تسوي عرسكم براحتكم
- ماهي نفس المشكلة برضو حا تتغرب وتتبشتن يعني بس دايرني اغير اسمها من ابوا لاسمي
- لا ما نفس الشئ هي لمن تمشي عزابية ما زي لمن تمشي مربوطة ليها في راجل وممكن بعد فترة تلحقا
- والله يا عمي كلامك سمح بس جوط لي راسي جوطة شينة
- يا زول انت راسك براهو جايط هسة في زول لاقي ليهو فرصة زي دي
- كدي خليني افكر في الموضوع براحة
- يا ولدي البت ما عندها وكت لازم بعد اسبوعين تسافر لشغلا
- خليني ادورا في راسي واحسبا
- ما تنسي ابوا حيسافر معاها دا لو وافقت ويقعد معاها الفترة الاولي دي كلها لحدي ما تكمل هي اجراءاتها وكمان اجراءاتك حسب العقد ولازم طبعا تكون قسيمة الزواج معاها
- وابوها حايخلي شغلو ولا كيف ؟
- لا حيشيل اجازة اصلو خمسة سنين ما شال اجازة ولا نزل السودان
يعاين فيني وشاف حيرتي
- خلاص فكر براوقة وابشر حرم الناقصة نتمها ليك بس ما تنفذر لينا وكمان البنية حاتشتغل , بختك مرا سمحة ومعاها قروش
- هسع وينا القروش
- والله راتبا السمعتو قدر راتبي مرتين
من دربي داك قمت اتصلت علي الاهل في السودان ووريتهم الحاصل بعد نقاش معاهم في الاخد والرد وصلنا لنتيجة ياهو العرس كان في السودان كان في اي مكان اهم شئ الزول يتلم علي بت الحلال رغم جرسة امي ودي شئ طبيعي ومتوقعوا هي دايرا تفرح بولدا وتحننو وتهز فيهو وتبشر عليو بس حال الدنيا وحكما .
تاني يوم طوالي اتصلت علي ندي وهاك يا كلام واشواق وريدة التقول اول مرة الاقيها واقول ليها :
- ابشرك
- خلاص
- اي
- هىىىى ما بصدق
- انا عندي اغلي منك
تضحك وتسكت ما خلاص الموضوع بقا ليها جد واواصل :
- انا الليلة بمر عليكم وبلاقي ناس بيتكم ونشوف الموضوع دا
نسكت شوية واقول ليها :
- اها تامري بشئ ( حركة المغتربين الشالوها من السعوديين )
- الليلة مستعجل كدي مالك
ابتسم واقول ليها
- ما دايراني اودعك ولا شنو
- دايرا اتونس معاك حبة
- مشتاقة لي قدر دا
تسكت شوية وبراحة تقول : كيف انا شوقي ما بكمل !!
- خلاص انا بخليك بشوقك دا لحدي ما اجي بعدين المساء , سلام
- سلام
في الشقة لميت الجماعة وقلت ليهم : انا داير اسوي عرسي هنا ودايركم تقيفوا معاي
ردودم الحلوة وتجاوبهم معاي عجبني شديد وعمنا طوالي نط وقال : يا زول ابقي بعيد نحن بنرتب كل شئ بس جيب العندك ونحن بنتم الباقي ..... الجماعة ما كضبوا فكروا في المندي وكلهم ما قصروا تب شدوا من ازري ورفعوا معنوياتي فوق في السماء وكمان حتة العقد في السفارة دي هم بتولوا امرها.
في المساء قشرت قشرة صاح واتوكلت عليك يا خالق روحي ومشبت طوالي لبيتم وهناك تقابلني البنية وامها ابوهم طلع قريب وبجي وبعد ما قطعت كباية العصير المخصوص وما شفت اطعم منو كلوكلو عشان عاملة ست الناس وقعدت قصادي تضاير ساي وتتبسم وتعاين فيني من اعاين ليها تغير عيونا مني اتونسنا شوية وجا ابوها :
- كيفك يا عمي
- تمام وانت كيف
- الحمد الله
صنة ما طويلة واتنحنح :
- طبعا يا عمي انا جايكم الليلة في موضوع العرس
- مرحب يا ولدي انشاء الله ربنا يتم علي خير
- يا رب .... وقررت نعملوا هنا وخلاص
- يا ولدي زي ما قلتا لعمك ما عاوزين منك حاجة ونحن مقدرين الظروف
- والله ما بتقصروا وانا انشاء الله ما بقصر
- مافي مشكلة بس تعال بالعندك وما تكلف نفسك وتعصر عليها
- الله يبارك فيك . اها استاذن انا يا عمي وانشاء الله بكرة بتصل عليك نشوف التفاصيل كيف
يمسك فيني في العشا بس بقي لي صعب بعد الكلام الحلو , وانا داير امشي اقعد مع الشباب في البيت عشان نحدد اليوم والطريقة تكون كيف . وصلتا البيت متاخر ولقيت الشباب ما قصروا وحددو معاي اليوم طبعا اقرب خميس جاي بعد اسبوع من الليلة ووزعوا الادوار ناس مسئولين من الصالة وناس عن المطبخ والمندي وناس للفنان والحفلة وكدا ........
________________________________________
طبعاً للقصة بقية.........؟؟؟؟؟؟؟
الأربعاء أكتوبر 05, 2022 12:14 pm من طرف أبو بكر محمد عبد الرازق
